甄子丹的23歲姨仔汪圓圓，今年才情竇初開，4月被發現和年長17年的道地綠茶老闆方振文拍拖，不料初戀只是維持了幾個月。汪圓圓昨日眼紅紅宣佈已和男友和平分手，胞姊汪詩詩透露兩人性格不合，嗌交傷感情分開。
投身模特兒界的甄子丹姨仔汪圓圓，昨日在尖沙嘴出席「新地全球限量千萬名錶珍藏展」，圓圓展示一隻價值200萬元的芝柏三金橋陀飛輪三問錶，問她可會買錶送給道地綠茶老闆男友方振文？汪圓圓即說：「我家single（單身），想集中喺工作上。」
曾花數萬慶生日
問是否已經分手？圓圓即時眼紅紅承認說：「我哋仲係朋友。」隨即轉話題：「不如講番父親節啦，爹哋好鍾意錶，但我要儲錢先買到畀佢，我最想送一對情侶錶畀父母，爹哋都鍾意男仔嘢，或者送電器。」
圓圓今年4月初才爆出和現年40歲的方振文拍拖，兩人只是拍拖了幾個月，今次更是圓圓初戀。4月中圓圓23歲生日時，方振文花數萬元為她搞生日，圓圓更甜絲絲大讚男友個性好，只是不夠浪漫。昨日問她為何會忽然分手？她說：「唔講喇。」她謂心情已平復，一直都想專注工作，也不會出埠散心。她指今次是和平分手，可是年齡差距大？她說：「從來冇諗過呢個問題，大家仲係朋友。」
胞姊：性格唔啱
記者致電圓圓胞姊汪詩詩了解，她說：「男女成日都有嘈交，我諗佢係第一次，冇乜經驗，畀啲空間佢啦。」她續說：「子丹都話過個男仔幾好，但係大家鍾意嘅嘢唔同，唔係年紀問題，可能係性格唔啱。」有第三者？她說：「唔係。」
採訪、攝影：LawWaiMan