貪錢？回塘？新挑戰？呢3個可能性，都係名帥史高拉利決定執教賓約哥嘅原因。呢間烏茲別克球會周三宣佈，「大菲」正式上任為球隊新教頭，與巴西同鄉李華度重逢固然係焦點，但史高拉利去到中亞咁遠教波，唔係個「錢」字邊有人信？
由爭世盃變亞冠盃
史高拉利職業生涯教過無數名牌球隊，甘美奧、高士路、彭美拉斯、葡萄牙國家隊等，最風光梗係帶領巴西捧走02年世界盃。「大菲」最近帶嘅球會係車路士，不過由於成績差，今年2月終於俾球會炒魷，等咗幾個月冇嘢撈，最後賓約哥搵咗佢做教頭，算係一個新開始。
現年60歲嘅史高拉利，講真有咩風浪未見過吖，但係睇番佢嘅履歷表，真係好似回緊塘喎。02年幫巴西5奪世盃之後，「大菲」都冇乜佳作，04歐國盃帶住葡萄牙，決賽都可以主場0:1輸畀希臘；其後佢再成全球焦點，08年7月成為車路士新領隊，點知又係爛尾收場。偏偏頂佢個位嘅暫代領隊軒迪克，就幫球會攞到英足盃，「大菲」條路真係越行越黑。
料偕李華度齊賺百萬周薪
其實，早前已傳出史高拉利好大機會成為阿聯酋國家隊新教練，講真佢成日同啲中東有錢佬扯上關係，你哋咪話唔關個「錢」字，我求大俠斬個頭落嚟當凳坐都得！賓約哥今次請「大菲」做教頭，價錢單嘢就收得好密；但係隊中過氣王牌李華度周薪都有8萬鎊（約100萬港元），相信「大菲」嘅待遇都唔差得去邊啦。
聽講史高拉利同賓約哥簽咗18個月合約，呢位巴西教頭就對新球會寄望好大，「大菲」話：「烏茲別克嘅足球水準正在起飛，賓約哥好有潛力稱霸亞洲。」唓，賓約哥家陣喺國內聯賽10戰全勝排榜首，講真有冇你帶隊都咁勁。
嗱，計我求大俠話，上年賓約哥都係由巴西教頭薛高領軍下，捧走國內雙料冠軍，兼喺亞冠盃殺入4強，「大菲」你攞到3冠王就可以再省靚招牌喇！
史高拉利執教之路
01-02年：巴西國家隊
03-08年：葡萄牙國家隊
08-09年：車路士
09年：烏茲別克球隊賓約哥