無綫噚日繼續安排候選港姐「縮胸周秀娜」Winnie、「油浸梁安琪」Hilaire及「擦膠頭楊羚」Mandy到銅鑼灣HAIR髮型屋改頭換面，因為佢哋外表太平庸，經幾個鐘改變髮型後，效果依然冇大改變。
做過新聞部
「擦膠頭楊羚」Mandy噚日改咗個鉛筆擦膠頭髮型，雖然洗唔甩娘味，不過佢勝在曾經喺無綫新聞部實習過，又寫過體育專欄，換句話佢可能早已識得無綫啲工作人員，Mandy話：「我喺無綫新聞部實習過，但同選美係兩個部門嘅人，所以我唔識大會嘅人。」但話雖如此，始終都喺無綫做過，話唔定對參選有幫助。
「縮胸周秀娜」Winnie噚日着背心熱褲出現，整裝後長髮染咗深啡色，髮尾鬈曲，驟眼睇增添咗一份成熟味，外表更似周秀娜，佢揚言對今次比賽充滿信心，事實上相比其餘9位候選佳麗，Winnie都算係唔錯。
至於「油浸梁安琪」Hilaire就俾人爆料數臭，話佢做空姐貪名牌，工作態度又唔好，噚日Hilaire拎住個灰色Chanel手袋，同之前幾次見傳媒時攞嘅名牌手袋都唔同款式，真係同爆料內容不謀而合，佢話：「咁啱啫。」
若讀者認識10位入圍港姐或知道她們的底細，可電郵至mailto:[email protected]報料。