歐資大行啱啱先至發表報告，話港股估值偏高，行將要調整兩成，點知個市即刻就挾你七百點，假如有炒友信以為真兼瞓身買埋佢哋出嘅熊證，咁就真係個市未跌身先死。市場所見，旁觀者只懂批鬥坊間講股佬講股婆準定唔準，唔理佢哋有冇理據，反正就算個市俾你先知上身講中當日升定跌又如何，只要之後嗰一日唔升上去，都會入埋你數話你估錯，睇嚟市場最需要嘅係預言家。
近排好多朋友都再次沉迷股市，佢哋唔炒大價股，而係集中於二三線股中出出入入，咁樣炒上炒落，閒閒哋個個月都畀銀行搵幾千蚊手續費，所以市旺唔只吹起銀行樓按貸款部門，更加帶旺埋證券部，最好嘅散戶指數除咗可以從呢份報紙嘅每周市場情緒與入市意欲調查中得到之外，飯前飯後行吓本地樓按一哥（中資銀行）個場，睇睇見唔見人山人海，就可以感受到嗰一排個市得定唔得。
我自己就好鍾意用電視電台股市節目中觀眾電話數量及所問股份類別測市，點解咁鍾意問番對方知唔知隻股票搞邊科？原因就係可以令大家更了解究竟入緊市嘅係一個點樣嘅人，當大家眼見連盲毛都入市，咁隻股份嘅下場就好易估到。
盲毛入市提高警覺
測市方法各師各法，只要平時做些少功課，或者肯吓心儀對象盤數甚至管理層點講嘢，再決定是否投入，必定唔會係最遲入市買貨嗰一位。因此當大家睇到無知小散戶以為真係可以博大霧，甚至連噏錯冧巴都可以贏錢，就係提高警覺嘅時候。
除非歐資大行個睇淡報告擺到明想你入局，否則冇理由與某財經周刊喻為睇市最準嘅對冲基金經理一齊睇錯，皆因大家可以理性地假設，早前佢哋仲係睇好前應已入咗唔少貨，現階段夠薑唱淡，當然又係有理由相信佢哋已成功勝利骨水大逃亡。
現時睇好嘅理由應該只得一個，當3點鐘效應突然於呢幾日提早咗11點幾就開車，應該唔係外資流入（睇見任總呢排咁得閒就知），唔通又係嗰4萬億度搣出嚟？冇證據唔敢講，唯一嘅理由應該就只有歸功於臨近建國六十周年效應，以歌舞昇平掩飾經濟黑暗面，順便買時間等翻身。
胡孟青