舊年新地（016）爆發家族風波，做開主席嘅大佬郭炳湘黯然離場，轉為非執行董事，自此少有公開露面。不過，噚日郭老大喺重慶一個企業論壇上現身，咁啱同香港電子傳媒偶遇，帶嚟「零的突破」，接受電視台訪問。
雖然退咗位，郭老大話仍然好關心「上市公司」情況，「我唔係直接參與行政嘅事，但就喺董事局、管理層方面，喺高層、宏觀方面睇吓，畀啲意見。」佢仲話：「當時自己只係想做多啲嘢。」反映郭老大就算唔再係公司最高權力核心，都仲想有番啲影響力。
退位後首現螢幕表心迹
新地貴為本港藍籌，一場家族風波曾引起市場質疑佢地嘅企業管治。郭老大認為上市公司董事局應該聽四面八方嘅聲音，招攬唔同社會人士、唔同行業人士，加入董事局，提出唔同意見。佢仲不忘評論吓港股同埋樓市，話近日本港樓市反彈係健康發展，未有形成泡沫，嚟自內地、外地嘅人都嚟香港，反映香港購買力仍然強勁，仲認為中港係最先走出金融海嘯陰霾嘅地區。
另一邊廂，新地發言人對於大郭生話畀意見上市公司，冇乜回應，但對於佢建議招攬各方人才入局，就話：「董事局成員包括多位來自不同界別社會賢達及專業人士，帶來多元化專業知識及豐富經驗；董事局將會繼續物色適合人選，加入成為獨立非執董。」咁唔知算唔算接納咗佢意見呢呵！
李華華
mailto:[email protected]