金融海嘯觸發美國華爾街金融機構接二連三陷財困，最令人睇唔過眼，係一班高層薪高糧準，但搞到公司財政唔掂，仍攞到一般打工仔做成世都可能搵唔到嘅巨額花紅，所以美國政府出手打救之後，即刻限制高層花紅。不過，白宮同埋國會各有一套做法，令人無所適從。
《華爾街日報》引述消息話，總統奧巴馬諗住將呢個「醜人」角色交番畀國會，日後就由國會頒佈規定，限制呢班高層薪酬，估計奧巴馬最快會喺今日公佈結果，結束呢幾個月以嚟，白宮同國會兩邊各有各限制高層薪酬嘅混淆局面。
國會睇銀行高層薪酬
奧巴馬仲會委任一名「專員（payczar）」，親自監督由政府泵水資助嘅企業。財長蓋特納亦身負重任，除咗睇實攞咗納稅人錢嗰班「大帝」，仲要監督企業嘅薪酬激勵制度，屬於長期性，同限制股份相關，並非與現金掛鈎。