世紀城市（355）系3家公司噚日喺自己地盤──銅鑼灣富豪香港酒店舉行股東會，竟然被指招呼不周，搞到有「維權」小股東企出來，善用傳媒採訪主席羅旭瑞嘅機會嚟個大控訴，直斥連派餅安排都搞唔好，點做好間公司；跟手仲醒咗主席羅旭瑞一句，「以後唔好咁喇！」十幾對眼望住，主人家即刻耍冧，搵人處理小風波。
借記者「維權」
除咗滿足口腹之慾，對小股東嚟講，最重要梗係佢哋買嘅股票能夠「財息兼收」。有富豪酒店（078）股東同華華投訴，話公司派息減少，股價又唔掂，令場內好多股東起哄，仲批評羅旭瑞囡囡羅寶文出席股東會時「打喊路」。
呢個謎華華都冇法解開，之但係，打喊路成因眾多，話唔定係徹夜諗方法為股東投資增值呢。