六四前後，報紙上有好多關於八九年六四民運嘅新聞，睇到目不暇給，關於六四嘅新書不斷湧現，最重要嘅當然係趙紫陽嘅《改革歷程》，要所有書都睇完嘅話，恐怕要幾個月時間。
肥仔K等一班同學去參加維園靜坐，因人太多，不得入硬地球場，只能在維園行咗個圈，叫做參加過。肥仔K穿上六四T恤，到便利店買水飲，收銀員對佢上下打量，收錢動作甚慢，最後講咗一句：「我支持你，你代表埋我去燭光晚會。」肥仔K為之愕然，佢穿上T恤，諗唔到有如此效果也。生於一九八九年六月四日之後嘅學生Y有胎教（阿媽大肚便便之時參加百萬人大遊行），家二十歲咯，成為大學一年級生，已放暑假，亦與一班同學去維園，佢又勤力噃，日刨夜刨之下，睇完本《人民不會忘記》，話自己以後不會忘記。
六四文章之中，最有趣一篇係一位馮偉才，署名「嶺南大學社區學院講師。」馮講師是何人也，不必深究，佢喺六月七日在《信報》第九頁發表一篇〈天安門廣場屠殺「真相」〉，最尾一句講：「《紐約時報》的Kristof是第一個記者說出在天安門廣場內沒有開槍殺人，並指出有學生說那裏發生屠殺是不正確的。」呢位馮講師又話：「《蘋果日報》和《明報》啲版本有意造成一個印象，軍隊是在與留守天安門廣場紀念碑上學生對峙時開槍的。」
以為呢位馮講師有獨特見解，點知佢漏咗馬腳，寫到明：「八九年六月三日香港《蘋果日報》和《明報》的報道，六四事件天安門廣場軍隊確實有開槍屠殺示威學生。」
死得啦，八九年六月三日之時，肥佬黎仲未發夢要出版《蘋果日報》，《壹週刊》要等到九○年三月十五日先至出第一期，呢位馮講師對最簡單嘅事實都記錯晒，又唔去查證，點教學生呀？點知到咗星期一，講師函《信報》更正，話《信報》搞錯咗。讀者睇完，豈無頭暈眼花之感覺！NicholasD.Kristof在一九八九年係《紐約時報》駐北京分社社長（BureauChief），現係《紐時》專欄作家，二○○九年六月五日在《紐時》發表一篇"BulletsoverBeijing"，開頭第一句講：「二十年前我站在天安門廣場西北角，目睹（watched）人民中國向人民開火，夜已深，槍聲在耳邊咆哮，長安街上，鮮血在流……」此文章十分感人，可以畀學生Y做參考資料。