李澤楷和梁洛施忽然生仔，震驚全城。近月社交圈都旺生仔，美心集團太子爺伍偉國和太太羅寶盈三年抱兩，上月初誕下第二胎7磅3安士兒子，而本地設計師RaneeK昨日現身活動透露已火速產子榮升媽咪。
美心集團太子爺伍偉國07年和鷹君集團太子女羅寶盈結婚，婚後火速造人，去年1月誕下兒子伍政熙，上月又誕下第二胎。羅寶盈上月初在港順產誕下7磅3安士男嬰，記者昨日致電恭賀伍偉國，再為人父的他開心說：「多謝！好順利，我哋初頭以為係女，因為好想要個女，不過，冇所謂，仔女都咁開心。」
送玩具畀大仔
BB似他還是似媽咪？伍偉國說：「日日都喺度變喎，又似我又似媽咪，名都未諗好，仲有時間。」他謂太太仍坐月，他難掩喜悅說：「哥哥得歲幾，唔係plan咁快再生。細佬第一日返屋企，我哋就代佢送咗啲玩具車畀哥哥，等佢開心啲，唔會妒忌。」他坦承沒有幫手換尿片、餵奶，可想再追個女？他說：「啱啱生完，睇吓太太意思，做媽媽好辛苦㗎。」
RaneeK一索得男
本地女設計師郭翠華（RaneeK）今年3月入紙排期和商人男友司徒璧光結婚，她昨日在灣仔出席西門子活動，肚凸凸似懷有身孕，她說：「我仔都生埋喇，家坐緊月，21日大。」她辯稱去年已結婚，並輕鬆說：「好快，所有嘢都好似喺30秒發生咁，囝囝乳名叫豆豆，因為喺個肚入面時好似一粒豆。」
問RaneeK可是意外有孕？她說：「算係有計劃生。家每3個鐘餵一次奶，都幾易湊。我想自然分娩，但BB心跳加快，最後開刀。」她透露產前暴升40磅，現仍欠20磅待減。
採訪、攝影：DebbieLum、JessicaNgan