中環在線:8號仔推新服務賀小小超 - 李華華

中環在線:8號仔推新服務賀小小超 - 李華華

大老闆又私有化又生仔多多搞作,8號仔電盈不怠慢,繼續搞新意思搶客,好似個人客戶董事總經理陳紀新負責嗰瓣,噚日就推出集電話、電視、多媒體播放器、資訊娛樂平台同互動功能於一身嘅「eye2」家居無線「多媒體」。
講開8號仔,不得不提小股東唔想公司就私有化上訴終審庭單嘢,早前佢哋搵過獨立非執董李國寶請願後,噚日收到其餘4位獨董嘅回信,話有留意上訴到終審法院會產生進一步使費,但公司已採取措施,務求將有關費用減到最低,又話呢啲費用唔會對公司造成不必要負擔。咁即係公司會去馬啫,睇怕今個月尾小股東都要踩上股東會,問吓班管理層到底有乜措施控制使費囉。