阿里巴巴（1688）大老闆馬雲果然相識滿天下，前兩日，佢個多年老友、量子基金創辦人索羅斯就帶埋老婆，去到馬總老鄉杭州，參觀佢個阿里巴巴總壇，兼出席「江南會大講堂」第5場講座「喬治．索羅斯沙龍」，當然唔少得馬總做東，宴請大炒家啦！
索羅斯千里迢迢去到杭州拜碼頭，係咪意味佢親身視察後，就會入股老友間公司呢（阿里巴巴剛宣佈同8個機構投資者提早分手）？聽佢老人家口氣似乎又唔係，事關佢話：「去中國係為咗更了解中國，阿里巴巴發展已夠好，唔需要我投資。」咁就證明兩樣嘢：第一，馬總間公司真係好掂；第二，雞髀打人唔係一定牙骱軟㗎！