中國電力（2380）噚日就收購水電項目搞咗個分析員會議同記者會，可能單嘢好大，以往唔係次次到嘅主席「女電王」李小琳都有現身。不過唔知點解，原本話唔出席記者會嘅李主席，失驚無神突然中途殺出嚟，最特別係又唔知點解，原本着黑褲嘅佢竟然換咗條白色褲！
李小姐一坐低，就講明佢好唔得閒，之後仲有會開，但換完褲諗諗吓，都想入嚟記者會講幾句嘢。佢話呢次用成50億港銀收購63%五凌電力，係集團04年上市以嚟第二個里程碑，因為搞掂單收購後，集團嘅裝機容量足足有5年前4倍咁多。
忙到冇時間落樓攞獎
佢仲話，由於呢個新收購項目係水力發電，令之前主力發展火力發電嘅中國電力，即時成為同系中「最清潔」嘅公司。點解咁講？佢話按裝機容量比例計，集團總發電量中將會有兩成電力由清潔能源所生產喎。
噚日仲有段小插曲，李主席可能真係太忙，喺開記者會之前，南華傳媒行政總裁吳旭茉要特登喺金鐘香格里拉5樓，走上去39樓頒個「成功女性大獎」畀李主席。唔通真係忙到連攞個獎都唔得閒？
李華華
mailto:[email protected]