筆者細路哥年代好沉迷《SD高達》，聯邦、自護名機任你舞，同時集動作與戰略於一身，Hit足十幾年；如今喺中韓兩地大行其道嘅網上群揪版《SD高達Online》，本周正式登陸香港！遊戲可謂將昔日意念，加上當今網遊賣點，據聞當有新蛋出，大陸Server玩家試過一日豪花150萬人仔扭蛋！既然玩得咁瘋狂，隻Game肯定唔慌差得去邊！
文：陳福榮
糅合街機、紅白機
呢隻《SD高達Online》由Bandai授權畀韓國Softmax開發，遊戲性絕對拍得住大受歡迎嘅自家製；家用機SD大混戰都出過唔少，唔加網戰元素好難再有新意；「安拉驚」韓仔一向經驗豐富，算係幾完美組合。遊戲基本以群揪進行，觀感似足街機大行其道嘅VS系列，分別在於班高達、渣古縮晒水，但打起嚟都係技術與戰術兼備。
雖然佢好多地方都跟足日本歷來《SD高達》嘅方針，但包括韓國原版在內，都只能使用當地語言配音（港版用粵語），據講係同版權事宜有關喎，因此香港繁中版係唔會聽到「依奇媽屎」，略嫌有啲可惜！
過兩百款蛋任你扭
高達已經面世30個年頭，由0079數到最新DoubleO，出過名機無數！唔單止有象徵正義嘅RX-78、Z、WingZero等，其實沙煞比、卡碧尼甚至舊渣古都受人擁戴；玩過舊《SD高達》都知，玩家並無規定歸於任何一方勢力，換言之只要扭得，想駕駛咩機參戰都得。暫時知道好大路嘅一眾型仔高達、絕大部份渣古以至《新機動戰記》嗰班騎呢高達都用得到，但會否更新到《SEED》及以後嘅篇章，就有待廠方進一步加插新機款。
除最簡單直接嘅二人互挑外，本作仲支援最多8人連線、展開4鬥4、紅/藍小隊對決嘅群戰模式，以及由多人進行嘅任務模式，會有意想不到嘅達成目標同巨大化機體俾你應付。
冇銀萬事不行
即使以前可靠技術以弱勝強！但喺《SD高達Online》就此路不通，一定要靠真金白銀！事關玩家想取得新機體就必須通過扭蛋過程，一係完成任務或拆解現存機體嚟換取G幣，但拆機所得嘅錢，往往只能扭到普通機款，勁揪特別版真係隨時一世扭唔到。
唔想費時失事，就要用真金白銀買M幣去扭，平均每隻蛋約值$2.2，據知稍為好少少嘅機都要咁先抽到，所以中國班機迷先咁沉迷；試過有新蛋Pack出，全Server居然一日內扭咗150萬元人民幣！真係賺到代理商見牙唔見眼。唔單止扭機要用錢！想增強作戰能力及提升戰鬥後所獲之經驗值，不妨聘用類似《機戰》個「副官」，或者嫌隊中部機冇乜個性，可以買模型油嚟整色整水。當然Tune勁部機又係要用錢啦，想贏得漂亮呢啲成本絕對唔慳得。
Profile
機種：PC
廠商：Softmax/BandaiKorea
代理：久遊/Gameone
類型：OnlineACT
價格：$98（星塵回憶版）
官網： http://sd.hk.9you.com
