24歲港男黃長發自搭上鞋王鄧劍群三奶李姿霆（Karen）後，兩人愛得轟烈，男方放棄星途，女方則被鞋王閂水喉，更遭入稟法院追討物業。但黃長發上周向Karen提出分手，令這段維持短短半年的姊弟戀宣告玩完，有傳分手原因是女方太黐身兼對男友管束太嚴。鞋王昨日謂早已預言結局，又強調與Karen的關係已是覆水難收，更說：「同佢行埋一齊我都覺得醜！」人財兩失的Karen都算四面楚歌。
黃長發半年前搭上39歲兼育有一女的鞋王三奶李姿霆，雖然兩人各自為愛情甘願放棄麪包，尤其Karen斷然與鞋王反面，水喉被閂，更遭收車收樓，甚至被鞋王鄧劍群入稟法院追討物業，但Karen仍堅持要跟黃長發在一起，奈何兩人最終仍分手收場。
傳Karen仰藥自殺
上周三黃長發向Karen提出分手，女方大受刺激，有傳她吞下整瓶安眠藥企圖自殺，幸家人及時發現將她送院洗胃，留院兩日已無恙。據悉今次兩人分手原因甚多，年紀差距太大是主因，Karen平日對男友十分黐身，要他報告行蹤、即call即到，以及出街嚴禁女等，熱戀之初黃長發愛到盲目，自然對女友唯命是從，但日子一久新鮮感減退，黃長發又冇工開零收入，雙方難免拗撬。
其次是黃長發和Karen拍拖以來，雙方家人一直持反對態度，黃長發與家人關係變得疏離，Karen父女關係同樣告急，李父更曾言明對黃長發沒好感，故每次黃長發現身李家，李父例必黑面。種種因素下，姊弟情終究無法開花結果。
「多謝長發救咗我」
鞋王鄧劍群對於Karen和黃長發半年情玩完感到十分欷歔，身在東莞的他昨日在電話中說：「其實我一直唔睇好佢哋呢段感情，都係估佢哋半年左右玩完，如果你哋冇忘記，之前我寫過首詩，已經預言咗今日嘅結果，我其中幾句寫『問世事，情何物；千金盡，萬事變；再回首，後悔晚』，我首詩有66個字，我今年就66歲，而佢哋被爆分手就係6月6號，你話係咪整定？」
鞋王鄧又謂對黃長發奪其所好沒有心存怨恨，他說：「以前我眼盲，唔知個女人咁衰，佢離開我之後先睇到佢嘅真面目，所以我要多謝黃長發救咗我，聽到話Karen自殺入院，但我唔係咁相信，佢都唔認自殺吖。」
Karen人財兩空，問鞋王鄧會否與她重修舊好時，他說：「冇可能啦！家同佢行埋一齊我都覺得醜，覆水難收啦！講真莫講係佢，家我見到其他女人都好驚，我諗全世界啲女人死晒，我都唔會要佢返我身邊，佢啲招數層出不窮，咁嘅女人我點會唔驚咗佢，家我都同律師傾緊要告佢誹謗。」
「同佢分手係解脫」
有指黃長發與Karen分手，主因是女方管得太緊，鞋王鄧感同身受地說：「Karen以前都係咁對我，佢打電話嚟聽遲咗都大發脾氣，出街又唔可以睇其他女仔，行蹤又要全部話佢知，我都頂得佢好辛苦，同佢分手都可以話係解脫。」談到Karen之前為他所生的女兒，他說：「如果Karen養唔掂個女，可以交番畀我，如果佢唔肯畀番我養，自己又冇本事養，咁我就畀錢個女嘅外公外婆照顧佢囉。錢就一定唔會經呢個女人手，我自己嘅骨肉點會忍心唔養。」
此外，Karen父親日前接受記者電話訪問時，提起黃長發即不屑地說：「我唔知佢點解成日游手好閒冇嘢做，佢次次嚟我屋企我就出街，冇嘢同佢講。」據知黃長發已搬返老家與母親同住，其胞兄黃長興昨在電話中說：「我有同細佬聯絡，佢暫時未有嘢做，佢係返咗去同阿媽住，家同家人關係好番啦。」與Karen劃清界線的黃長發，近日連手機號碼也換掉，Karen昨日則拒聽電話，至截稿前均未能與他倆取得聯絡。
採訪：陳月媚、比華利
娛樂資料庫：姊弟戀半年玩完
港男黃長發與鞋王三奶Karen的戀情，由相識至分手不過短短半年，簡直快過打針，過程更比無綫劇集更具戲劇性。
去年底
黃長發因教法文，搭上比他年長16歲的富商鄧劍群三奶Karen，有指黃向富商發出涉及露骨閨房事的挑釁SMS。
今年
2月11日：黃長發攬實女友見傳媒，宣佈為愛退出娛樂圈。
2月14日：Karen父向本報爆料，指女兒昔日感情生活多姿多采，他為棒打鴛鴦弄至父女反目。
2月23日：鞋王鄧劍群匿名接受本報專訪〈圖左〉，指Karen大話連篇，又謂兩人關係一刀兩斷，Karen與二人的女兒往後生活只能靠自己。
4月1日：鄧劍群不惜公開身份入稟高等法院，追討Karen持有的三個物業及售樓得益。
4月3日：黃長發與Karen高調拍拖遊街〈圖右〉，又唱雙簧向鄧劍群還擊，黃直指鄧劍群收回「禮物」好有問題。
上月8日：Karen和黃長發拍拖到清水灣的沙灘乾煎，女方全程貼身服侍男友。
本月5日：有指黃長發向Karen提出分手，又向無綫表示希望重返娛樂圈發展，有傳Karen大受刺激自殺入院，但她否認。
本月6日：Karen向傳媒承認已跟黃長發分手。
資料來源：《蘋果》資料室