大市在萬八大關爭持，但日中大幅波動，恒指曾升過223點，但亦大跌過543點，高低相差760多點，收市仍守穩在萬八點之上，報18058，跌194點，但已跌穿10日線（18239），噚日最低曾落到20日線（17668），短期會再次考驗支持。
噚日突然彈出隻中策集團（235），高踞大升榜首位，最高0.28元，收0.255元，大升0.134元，升幅110.7%，成交賓虛咁嘅場面，有8.65億股轉手，總值1.67億元。中策前日收市市值僅2.45億元，但就威水到做成一單超級「披成」，分階段配售780億股，每股0.10元，集資淨額76億元，係市值的30倍，擺明幕後會有大動作，股價即時飆升逾倍。中策係一隻下半年要特別留意嘅股票，好戲會陸續有來。
大市調整，下跌正股超過800隻，好多股票由高位回落頗多，可留意實力好股的低吸機會。中國龍工（3339）上周二高見4.78元，噚日最低落到3.76元，較高位跌21%，尾市略為回升，收3.91元，10日同20日線亦已跌穿，走勢雖然轉弱，但好股唔怕買，調整正好趁低吸納。
集團主要生產基建機械、輪式裝載機及農業機械，係內地3大輪式裝載機製造商之一，市場份額超過20%，中央大力扶農，振興經濟，龍工係前列受惠者。
08年度（12月年結），雖然全球金融危機令經濟放緩，但集團業績仍有好表現，營業額61.45億元人民幣（下同），升15.7%，經營溢利8.93億元，升12.2%；股東應佔盈利6.65億元，升5.7%。由於鋼鐵成本大漲及毛利率較低的新產品佔總營業額比例上升，毛利率由22.45%下降至19.11%。去年每股盈利0.31元（已就今年5月1送1紅股進行調整）。
1年目標4.5元
今年首季業績理想，輪式裝載機定單增加，新產品成為增長動力，挖掘機銷量同比升3倍至2600台，叉車升1.84倍至5000台，而壓路機升1.44倍至800台。由於鋼價已大幅回落，公司今年業績會有更佳表現，保守估計盈利可達7億元，每股盈利0.327元（約0.37港元）。
龍工中期浪頂已現，可待股價回落到3.30至3.50元時收集，一年目標價4.50元。
郭兆誠