中國金屬再生資源（773）公開招股，純睇公司名未必咁易估到間公司業務，原來係內地廢金屬回收處理商。該公司計劃發行3億新股，最多集資15.5億元，規模唔細。
呢間公司賣點係環保，算係有概念，另一賣點是獲得西京投資管理主席劉央旗下管理的基金，大手入飛認購其四分一的發售股份，所需資金近4億元。
中金再生有基金捧場
該公司集資額由原來市場流傳的6.6億至10.5億元，增加至11.94億至15.54億元，集資規模大增，與市場氣氛好轉應有莫大關係。據報道，其09年預測市盈率介乎9.6倍至12.5倍之間。
廢鐵回收，盈利能力好視乎環球金屬價格，假如爛銅爛鐵價格大幅波動，回收商要冒存貨跌價風險，例如去年金融海嘯爆發不久，廢紙及廢鐵回收後國內買家拒絕接收，搞到大堆廢物在碼頭積聚。當然相反亦然，金屬價升，存貨可以賺多啲錢。有趣的是，德昌電機（179）剛披露，因虧損嚴重而結束了廢鐵回收業務。
此股市場上影子股不多，勉強有天能動力（819）開展回收舊電池業務，另高寶綠色（274）早年已投資再生能源，以廢輪胎煉油，並獲批在元朗工業園開展該回收業務。用廢輪胎煉油，好視乎油價高低，但另一方面廢輪胎屬污染性高的廢料，輪胎本身也屬甚少人肯回收的物料，回收成本極低，油價若不大跌，這項業務應該有利可圖。高寶剛宣佈收購化妝品業務，有關再生能源的新消息不多，假如看好回收行業，暫時惟有認購新股先。
歐陽風