「Van仔」係鄧穎芝Vangie暱稱，人可愛但偏愛辣跑，自出道已經試過唔少勁車，今次試車會唔會反其道而行，估佢唔到呢？Sorry，毫無意外，都係勁車，「GT-R吖唔該，要型色喎。」乜係型色呀？黑色應該啱嘞啩？「我鍾意白色喎。」不得不說，Vangie，你真係好難估。
記者：梁美甜
攝影：周旭文
試車第一步換鞋！
一身古銅膚色嘅Vangie絕對係外向女孩，「超鍾意運動，尤其係水上活動同籃球。」見佢細細粒，估唔到佢咁Sporty，或者就係因為好動，所以主持網上電台《潮頻道》體育節目，「我係咪好男仔頭性格呀？我……」「佢真係好男仔頭㗎！」都未講完，Vangie保母已經予以肯定，兩人即時笑作一堆，好孩子氣。
係咪因為男仔頭，所以情迷辣車？「我因為鍾意揸車，之後至鍾意車，18歲考完牌諗住要部MINICooper，你知喇，十個女仔九個都鍾意，夠得意嘛。」記憶中Vangie從未擁有過得意車仔，「係呀，考完牌，屋企人以安全為理由，送咗部二手C180畀我。」貪部車夠硬淨鍊車夠安全？「係呀，你點知呀？」感同身受囉！「我不知幾唔願意，你明喇！」夠紮實但唔係幾型咁啦！「係呀係呀，所以一年後嘅生日禮物係CLK跑車，型啲先見得人……不過我最想換部四門辣車，或者SLK啦，可以車埋朋友出街玩，又型！」換來換去咪又係同一個牌子？「哈……又係喎。」咁鍾意型，咁今日順便挑戰埋GT-R喇，「好……」Vangie講完個「好」字就走番入保母車，做乜？換鞋！竟然唔着平底鞋，換番對高踭鞋試車，咁都得？
佢踩油我心跳
「我最重視外觀，最好有包圍，型啲嘛，望真部車幾型，但點解咁多碳纖，少番啲型啲喎。18吋黑軨，型，車尾四圓燈先至最型……桶椅都好正，唔知包唔包得晒呢？嘩！尾箱咁多喇叭，呢個係擴音器？好型喎……」講咁耐，即係催我俾佢快快上車啦，OK，出發喇！
隆──嘩！引擎聲真係未停過，引擎每隆一聲，我個心隨即卜卜跳，Vangie試得認真，我就有啲擔心，不過，女孩劈GT-R，又真係好型。隆聲飆近，Vangie落車，「嘩！同我想像中一樣咁勁，細細力咋，已經80公里喇，估唔到行住車都可以聽到歌詞唱到歌呀……（一輪嘴說個沒停）」乜有跑車行車時聽唔到歌詞咩？「林……嘿！費事俾朋友鬧。」
後語 唔笑就係型
整個訪問，聽得最多係個「型」字，乜嘢係型？「唔笑就係型喇。」Vangie咁睇。係？整個型Pose影相吖？佢二話不說來個特大超誇張大字形趴地Pose，吓？全場即時爆笑；坦白講，佢真係好鍾意郁，超多表情同身體語言，同佢做訪問，好開心。
加辣改裝拆解
點解呢部BlackEdition會令Vangie眉飛色舞？因為係超級改裝版，人工包料改裝費要成差不多$100,000，令車身性能馬力更強悍，有乜改裝部件？睇嘢啦──
碳纖頭冚 $28,000
鬼面罩 $4,900
碳纖尾翼 $12,000
音響 $48,000
碳纖內飾 $4,500
查詢：R-ProShop（28776700）
規格
引擎：3.8公升V6雙Turbo
馬力：480ps/6,400rpm
扭力：60kgm/3,200-5,200rpm
傳動：六速半自動波，四驅
0-100km/h：3.6秒
售價：$899,000起
查詢：富利堡（23020750）
