幾個靚妹圍在報攤七嘴八舌，行開後開始議論，我偷偷聽。其中一個說：「點解李家皇朝添丁，可以做到《蘋果日報》頭版？係咪佢阿爺買起頭版，當落廣告？」另一個藐藐嘴答：「你生仔有乜奇喎，生仔生了塊梅菜出來才是大新聞吖嘛。呢個世界真係有錢大晒，生仔都做到頭條。」
「件事對後生女有很大副作用。」大家問點解，靚妹中貌似大家姐的說：「人人恨做封面，但全世界得一個李家皇朝，點夠分呢？使橫手一樣得。女學生集體索K吸毒咯，或者夾埋打劫的士咯。一樣可以一夜成名，上晒頭條，爭議性勁過靚聲村姑。」
「以後，想靠露肉做新聞，怕且唔work了。潮流變得超快，天生麗質未必襟撈，唯有行怪雞，二十歲扮四十八，靚女扮阿嬸，反而煞食。」
「大家表態睇吓，到底支持邊樣：20歲未婚生仔，抑或沙灘開餐索K？」我見她們全部高舉兩手，「這叫做兩手準備。」靚妹齊聲說。「不過，未婚生仔最好搞清楚，係李嘉誠經手，才好落叠。哈哈哈。」我冇聽錯，她們四把嘴冇澄清。日光日白，諗住跟首富未婚生仔的少女，應該無K落肚。她們的笑聲遠去，我漸漸覺得，這個都市，真迷幻。