港府準備用七億元購買豬流感疫苗，優先為65歲以上長者、幼童、長期病患者同醫護人員等較高危人士注射，根據政府標準，即係話首富李超人同佢個孫仔長治都可以享用免費疫苗，其他年逾65歲富豪亦可以受惠於呢項德政，唔使自己張羅疫苗咁麻煩。
食衞局局長周一嶽噚日就話自己唔屬於上述任何一類人士，所以唔會爭住打豬流感疫苗。沙士爆發時，醫管局高層都中招，周一嶽帶領抗疫，萬一染病怎麼辦？
有剩先考慮注射
佢話決定邊啲人優先注射疫苗，係純粹從科學角度考慮，總之評估後屬高危人士優先，當局冇特別為高官預留疫苗，特首都唔例外，佢個人會喺疫苗有剩時先考慮注射。
話雖如此，煲呔今年10月就65歲生日，即係可以接受免費注射，以佢食得唔好嘥性格，去打疫苗針都唔出奇。
港大醫學專家袁國勇則話唔會第一時間去打疫苗針，因為目前病例顯示H1N1病毒唔係十分惡，一般人病幾日就痊癒，如果病毒變得犀利好多，佢先會考慮排隊注射。