等外賣時聽到人龍裏面有幾個Ｙ世代男女講笑，外表睇他們屬於索Ｋ族，說不定等錢使還會打劫的士司機。誰知一開口，原來是時事評論員一類。這天中午，他們的評論焦點，是初生孩子叫做李長治的頭條新聞。「果然是李家皇朝，連接班人都叫做長治，擺明長期統治，外人咪旨意奪權。」嚼住香口膠的Ｙ女如是說。「日防夜防，雖然長治，但未必久安，分分鐘殺出另一個哨牙通，長治的江山就會全盤過數，益晒風水佬。」另一個箍牙妹接嘴。「長治返到學，同學會將長讀長輩那個長音，你長痔，幾惡搞。」檸檬茶男奸笑。「長治，即係長官意志咁解。」着迷你短褲的Ｙ女說。「不過長官意志係乜，我唔識答，返去睇下YouTube至知。」
「代表曾蔭權咯。將個孫改名長治，曲線挺曾！」電車男一槌定音。「你咪發夢啦，曾特首唔係自己友無資格長治。我諗李阿爺係暗傳中央聖旨，叫香港人唔好諗大，以為可以自治。長治權永遠唔屬於香港人。就算七一再次爆街，都冇得傾。」
最後出聲的靚仔用潮語說：「大家都聽錯，個孫其實係叫做『長住』，地產長住長炒！」