愛音樂、愛聽歌，又怎可以唔講究耳機，無論你係用手機、iPod定係Hi-Fi，一個好耳機的確能令音質靚好幾倍，其中我偏愛木製耳機，音色有一種獨特清脆嘅感覺，低音演繹亦唔錯。最近試聽一款新推出木製耳機MingoWM-2，音質好啱口味，而且仲係本地設計推出，值得支持吓。
人聲清脆
WM-2低音方面唔算重，但勝在清楚，與家用音響系統不同，耳機低音適中，對播放效果更好；WM-2這方面做得唔錯，而且因為用上木單元，聽歌時人聲清脆，與低音平衡上相當唔錯，未有因為低音而影響人聲清晰度。因為單元使用不同木材，不同位置甚至硬度都會對耳機音色有不同影響，按唔同人嘅喜好，WM-2會有兩個版本，「深木銀圈低音版」及「淺木金圈人聲版」，前者低音較重，適合一般流行音樂，而後者對人聲同音樂分析力都較高，低音相對較輕，反而適合多種類型音樂。
記者：許福合
查詢：亦軒（27706919）
