姚嘉妮和林祖輝結婚兩年多，於4月底誕下囡囡煦錡（Kyra）。未有BB前，她經常用枕頭扮大肚。懷孕的九個月裏，嘉妮每天都期待自己的變化，非常珍惜這段時光。「有時會諗點解要懷胎十月，到自己真正做媽咪，先知每個階段有唔同變化，正正俾女性準備好心情去做真正媽咪。」自言以往較細膽的她，現在要站在女兒面前，變得更堅強勇敢。
記者：林佩婷
攝影：楊錦文
服裝：DeVersion
3個Ready生BB
從報章看到她說懷孕不是順其自然，是經過詳細的計劃，不但生理心理作好準備，還特地為懷孕而增磅。「我哋兩夫婦一早有默契，認為生BB要有3個Ready。首先係要有個健康快樂嘅心態，要知道佢會一世跟住自己，無論點都要愛錫佢。其次就係身體要健康，之前做晒BodyCheck，當時我約106磅，就特登食多啲增肥去到110磅，令身體更適合去陀BB。最後當然係錢要Ready，我哋唔使好似廣告話400萬咁誇張，但都要儲到BB頭幾年的使費，所以我為咗BB又會慳啲。」
傾偈當胎教
現時父母由懷孕一刻開始，就推行精英教育，希望子女將來有更好的競爭力，胎教的方法層出不窮，但嘉妮卻反其道而行。「我唔使BB好叻或做No.1，最緊要自己保持開朗就得。朋友送莫札特我都有畀佢聽，但最多聽自己鍾意嘅音樂，好似攬住個肚去聽BillyJoel演唱會。另外我會同佢傾偈，同佢講你個頭仔同眼仔要大啲、心跳要好啲等，就連老公返到屋企，第一件事就對住我個肚傾偈、錫吓個肚。」
戒零食死忍
相信懷孕最大的挑戰就是要戒口，尤其嘉妮熱愛零食及大閘蟹，美食當前惟有死忍。「平時我好鍾意食朱古力、雪糕、可樂、芒果、魚生等等，尤其至愛大閘蟹，剛好撞正當造季只有死忍。有時真係忍唔住就食一啖止癮，試過出去食飯問老公係咪好想飲可樂，跟住自己借機飲一啖。最搞笑嗰次見佢食大閘蟹，忍唔住一隻手指插入蟹膏食咗一啖。」
大肚寫真顯美態
嘉妮懷孕最高峯時只有140磅，身形苗條不顯臃腫，還拍大肚寫真留倩影，全因機緣巧合。「其實我識好多朋友都係攝影師，26周時貪得意同老公一齊影。後嚟朋友個朋友太太同一時間有咗，太太影出嚟好靚，於是我到36周又影番輯。因為我唔知自己將來仲會唔會再生，咁如果唔生的話，就係人生唯一一次大肚，所以影低留念。」見到嘉妮超苗條，可見懷孕期間落了好多工夫，但她說沒有刻意KeepFit。「我係個心急人，瑜伽動作太慢我無耐性，打羽毛球又無得周圍走。咁我住西貢，每日行上行落都一個鐘，可能咁樣身體好健康，無咩腰痛頭暈。」
名字見陽光
女兒Kyra中文名煦錡，看來組合相當特別，還以為是搵專人改，原來是爸爸林祖輝的提議。「當我哋改名就好傷腦筋，發現字選擇好少，成日都係晴、希、雯呢啲字，我哋唔想改個名通街有。最後改咗煦錡，發音好聽時，意思即好似春天陽光，就連英文名意思都等於Sunshine。」
1.懷孕後覺得自己生命改變了，心情既開心又複雜。
2.老公第一下剪不斷臍帶，還以為是因為剪刀太鈍，被太太取笑以為剪綵咁容易。
3.眼仔睩睩的Kyra，櫻桃小嘴最似媽咪。
4.Kyra晚上不愛睡覺，但眼瞓又扭計喊，嘉妮就同佢鬥望等佢瞓為止。
5.看到Kyra身體健全，又喊得雄壯，嘉妮才眼濕濕鬆口氣。
6.現在嘉妮以BB行先，跟囡囡有關的都令佢開心。
