噚日係華潤電力（836）以藍籌身份成交嘅第一日，咁啱集團喺香港舉行股東周年大會，總裁兼首席財務官王帥廷話，晉身恒指成份股，係成個集團經過2063日奮鬥嘅成果，亦係佢哋上市以嚟嘅夢想，結果終於夢想成真。佢仲話可以成功躋身藍籌之列，代表市場對集團嘅肯定喎。
雖然成功做到藍籌，但王帥廷話佢哋唔會自滿，日後路途仲好漫長，管理層會繼續為股東爭取回報咁話。睇番華潤電力噚日股價，王總又講得冇錯喎，因為咁唔好彩撞正跌市，染藍首日股價就跌3.98%，收17.86元，真係要努力努力。
對於喺上周五恒指調整比重當日公佈供股，財務總監王小彬話只係咁啱得咁蹺，唔係特登嘅。佢仲話，由於大股東已經承諾供股，所以佢哋對供股成功充滿信心。