新股市場開始升溫，要喺一眾新股中突圍而出，除咗可以用好多錢搵代言人宣傳，其實用吓腦都可以以小博大。就好似月底上市嘅運動產品品牌361度（1361），就諗到用「舊鞋換新（361運動）鞋」嚟宣傳，都幾夠噱頭。
可能佢哋驚淨係換鞋唔夠號召力，所以喺嚟緊禮拜日嘅換鞋活動，請埋電車男夢中情人Angelababy，同埋啱啱過檔英皇嘅古巨基嚟撐場。活動會喺今個禮拜六、日喺旺角朗豪坊舉行，每日限換361對。
講開又講，361度個股票編號係1361，斷估應該係捐錢買嘅，專登同個公司名一樣都幾好記。睇埋同期打對台嘅洗頭水股霸王集團，編號係1338，若果又係買嘅話，唔知係咪特登想食個「8」字，定係同產品宣傳，「一生生髮」呢？