70歲的上一代笑匠吳耀漢，移居英國13年後，終決定舉家回流香港。他昨日偕妻子、兒子吳嘉龍及其女友和女兒一家出席花店開幕，自爆當年為測試自己生育能力，才生兒育女。
陳方安生、梁愛詩和何超瓊等名人常光顧、擁有60多年歷史的中西花店，昨日在擺花街開設新店。老主顧陳方安生主禮兼幫手插了一盆名為「喜悅之光」的花藝擺設作慈善拍賣，為替長者做白內障手術的「長者之光」籌款。
70歲返港拍戲
久未露面的吳耀漢一家四口現身，又跟兒子吳嘉龍在台上講笑做訪問，吳耀漢說：「我太太早幾個月都做咗白內障手術，做完手術即刻睇番嘢，唔明白政府點解要啲老人家排咁耐、搞咁耐，呢個機構喺6個月內會幫老人家做。」他謂有老花眼，耳仔不靈光，只剩下七成聽力，問他人老可有催兒子吳嘉龍生仔？他說：「等佢蚊都瞓，終於有日佢要證明自己得唔得，就會去生，我當年生完女生仔，生完又生都係咁諗。」
與兒子早前一同參演澳門回歸題材的電影《奧戈的故事》的吳耀漢，決定正式回流返港，他說：「我去咗英國13年，家一定回流，但唔想退休，我70歲，唔想淨係打golf過日子，仲想做嘢拍戲。」
韓君婷不隆胸
同場，韓君婷早前簽約隆胸又甩底，搞出個大頭佛，她昨日說事件已經解決，蕭定一也不會追究她，她說：「唔會再做，傾好晒，大家有大家理由，月中會有新工作。」問她可是返亞視？她則表示未定詳情。
採訪：JessicaNgan
攝影：EdwardChou