港交所（388）上市委員會上周五大換班，獨立股評人DavidWebb噚日撰文「拆局」，指新增嘅8個委員同大孖沙關係密切，而最似有「瓜田李下」嘅例子，全部同港交所主席夏佳理（Ron）有關，又牽涉到香港首富李嘉誠。唔好忘記，阿Ron有份揀蟀㗎。
Webb直言，新任委員嘅和黃（013）公司秘書施熙德，係慈善團體「伸手助人協會」執委，而個會係阿Ron愛妻Johanna夏安麗做主席嘅。
上市委員會現屆副主席李嘉士，89年已經係胡關李羅律師行合夥人，呢間行嘅其中一個創辦人就係港交所前主席李業廣，而阿Ron喺2000年前亦係呢間行嘅合夥人，胡關李羅仲做埋長實（001）、恒基（012）、新地（016）等大藍籌嘅法律顧問，認真架勢。
Webb：四大行代表似世襲
至於今次上市委新組成嘅班底，Webb就批評四大會計師行代表有「世襲」意味，好似安永嘅吳繼龍冇連任，就由同事梁小東頂上；羅兵咸永道嘅葉冠榮卸任，由該行嘅孫寶源代替；德勤路沛翹告退，就換上畢馬威嘅鄒小磊。Webb質疑，四大係咪就等同優質會計質素？佢話四大過去都牽涉唔少涉及上市公司嘅法律訴訟啦！
總之都係嗰句，恐怕上市委日後會向商界利益傾斜。
李華華
mailto:[email protected]