人生就如摩天輪，當好多人話曾破世界轉會費紀錄嘅丹尼臣，家搞到要去越南落班叫折墮，我求大俠就話佢喺度嘆世界就真，事關上周六缺席FC海防「地標戰」嘅丹尼臣，原來有傷在身，都唔知幾時先可以上陣，家淨袋高薪人工但唔使踢波，真爽！
港產舊片有套好嘢叫《她來自胡志明市》，女主角郭綺莉喺越南撞到個富商，繼而搵咗一桶金後走人。係人都知巴西仔愛蒲、貪玩、要名利，喺巴甲球會聖保羅青年軍出身嘅丹尼臣，大可拍套現實版《他來自聖保羅市》；皆因劇情又係俾FC海防高薪聘請，但家陣原來係有傷而唔係缺態，極可能有排唔使幫球會上陣。
上周六各地傳媒吹到好行，話丹尼臣會喺越南聯處子上陣迎擊峴港，即刻吸引咗近3萬名球迷入場，一睹呢位「濕手巾」嘅扭波技巧。點知當時球會話丹尼臣缺態上唔到陣，而球隊亦輸埋0:2，搞到球迷即時鼓譟，兼向球場擲雜物同焚燒球會會旗。
最快要6月下旬復出
丹尼臣缺態唔上陣呢單嘢俾我求大俠查到有內情，原來係丹尼臣整傷咗右膝，聽講最保守估計，都起碼要到6月下旬先可以復出。話就話6月下旬啫，但巴西球員療傷一向可大可小，好似大哨同阿祖咁，可以療傷到長期唔替球會上陣，返埋巴西happy仲得，嘩！FC海防今次容乜易畀人搵咗笨都唔知㗎？你知啦，FC海防出到成5萬至6萬美金（約46萬港元）嘅月薪，先至打動到丹尼臣加盟，以越南嘅指水嚟講，真係超高呀！
丹尼臣就着數咯，每個月有成40幾萬港幣收入，家陣以受傷為理由唔使踢住，咪當嚟越南觀光一下囉！大家試幻想下，曾經身價達到全球最高嘅2,150萬鎊人物，喺胡志明市中心踩住架單車、戴住頂草竹帽、再着埋件長袍周圍走，淨係睇呢場馬騮戲都夠晒過癮啦！不過話時話，丹尼臣都係黑人，唔知改頭換面之後，有冇球迷認得佢呢？