公關大姐大嘅同學母親仙遊，剛好呢位同學就係曾掌管消委會多年之總幹事彭美拉，亦與左丁山相熟，於是大姐大搵埋左丁山一齊去「世界殯儀館」在靈前鞠躬致哀。彭美拉母親生於一九一七，以傳統計法，積閏享壽九十有六，可稱得上「母儀千古，駕返瑤池」，後人哀而不悲。
聯王楊瑞生前輩撰輓聯云：
「懿範長垂，持家教子有方，親友同稱真淑德。輝煌永耀，興學育才無數，故交猶記舊賢師」。
彭美拉母親為黃門簡氏，名懿輝，中山大學（一九四一歷史系）畢業，戰後為香港孔聖堂大坑義學校長，實實在在係「持家教子有方，興學育才無數。」
大姐大與彭美拉、張大姐等係崇基同學，彭美拉先父黃福鑾係崇基史地系教授，當年在馬料水讀書，都唔知幾快活，大姐大講過少年不知愁知味，下課後中午冇堂上，三個人就走上雍雅山房飲下午茶，不時見到明星拍戲，如今雍雅山房已拆卸改建所謂豪宅，此情不再矣。左丁山就話自己讀書時，在飯堂拿不出三元五角吃「大餐」，那敢學人走去馬料水雍雅山房？即使去到大埔道山邊，都唔敢行上斜路入去啦！
晚上夜祭完畢，有人話自殯儀館出來，不宜直接返屋企，於是諗咗一陣，坐的士去洗衣街利苑吃晚飯。的士去到黑布街轉奶路臣街入洗衣街，嘩，幾塞車噃，街上嘈到不得了；左丁山之童年就在洗衣街度過，當時可以在馬路上踢波，而今行出馬路就驚俾汽車撞到，在行人道上就驚俾行人碰親。諗起呢條街啲舊樓係冇嘅，老居民上樓落樓怕會好辛苦，點解唔清拆重建呢？理由大家都知，就係「波鞋」作怪，市建局搞到頭大如斗仍然無法搞掂。
洗衣街利苑算係利苑「本店」，歷史比較耐。大姐大平時食飯多在港島，此晚第一次到利苑，吃過柚皮之後，驚嘆水準乜咁高，左丁山深然其說，覺得新城市廣場利苑與洗衣街利苑甚有分別，有時即使係同一個老闆，同一個集團、同一個名字嘅食肆，都唔好以為有同樣食法！