夏天正式殺到，一係就攝氏35度高溫曬到部車變成火爐，一係就傾盆大雨浸到部車變成水車，做車主都咪話唔煩。上星期介紹咗防曬膜畀大家抗烈日，今次仲唔輪到出招迎暴雨？內櫳要防水、車身趕水珠，加埋靚靚汽車用遮袋，三招為車主遮風擋雨，話之佢紅雨定黑雨都無有怕啦。
記者：許維雅
攝影：譚盈傑
Model：Creamy
1.防水兼吹乾
早喺上星期已經有紅雨警告出現，場雨好似倒水咁，有架車代步固然好，但大風大雨之下上落車始終十分狼狽，最後都係搞到架車內櫳濕晒，個人又濕晒，周身濕唔舒服仲要揸車，慘！積水搞到架車又臭又易滋生細菌，仲慘！所以做足防水措施，實屬明智之舉。防水袋、防水墊、防水盤乜都齊，全車加人畜都照顧周到，更估唔到係竟然有坐墊識出風，等你乾快啲，係咪咁神奇？咁實用又過癮嘅發明一定唔會係《國產凌凌漆》文西嘅傑作啦。
BONFORM風扇坐墊 吹住快乾爽
12V專用，背部同坐墊位置有過千個細氣孔吹出微風，近腳處仲有風扇仔，凉浸浸之餘，濕咗身都乾得快啲。雖然風力唔算強，但每個位置出風都十分平均。
BONFORM防水坐墊 唔怕你濕
用類似潛水衣嘅物料製造，有防水效果，更有防滑作用，呢款尺寸特大，連頭枕位置。
3D防水寵物袋密實小竇口
內層有絨毛吸水，外層物料可防水防滑，可水洗，仲可以捲埋掛喺椅背。
MMP3D盤 積水無碇捐
一般放喺車尾廂嘅防水膠盤都係十分重嘅透明橡膠物料，但呢隻類似壓縮咗嘅軟身發泡膠物料，極之輕身，處理積水更方便。
2.油膜新嘴更方便
搞完內櫳就到車身，玻璃油膜必定係必備用品。喺車頭擋風玻璃同側鏡塗上一層油膜，水珠會自動跣走，唔會停留喺玻璃阻礙視線，大風大雨時揸車更安全。市面上有很多油膜塗劑選擇，大部份係噴裝再用布擦乾，為咗方便懶人，唔少日本產品已經裝上棉頭擦嘴，更方便易用。堅持用抹布？得，都仲有唔少選擇。
PROSTAFFJetBe撥水劑 噴抹一剔過
最新油膜產品用上刮水器嘅設計，輕輕一按，液體自動滲出，十分易用。每塗一次可維持180日，只要保持嘴頭水平角度，直落同橫掃各一次即可。
Glaco特長油膜棒針對大車
特長手柄，適合一啲車身較大嘅汽車。掃一層，等5至10分鐘，再用乾布抹乾。
AmetVi油膜棒好使三角
三角形棉嘴頭設計，方便塗上啲角落位置。
CARMATEG3Jet油膜噴劑 3秒速乾
只要薄薄噴上一層，3秒速乾。
3.遮袋實用花式多
其實一架車，遮袋真係唔少得，把遮帶上車之後，漏出嚟嘅水無袋裝住都幾唔掂，成張地毯唔使要。
PAZIOWISH
絹料遮袋
掛喺頭枕位方便打開，最多可放入三把遮。
a/台日汽車用品公司（23924244）
b/偉良汽車配件中心（23842464）
