如無意外，卡卡將會喺今日公佈前程，或者因為大局已定，佢前日場世盃外踢得特別生猛，射入12碼埋齋，幫森巴大軍作客大炒烏拉圭4:0，仲趁巴拉圭輸波升上榜首。咪以為巴西贏波係理想當然，原來對上一次喺「烏圭」首都作客贏波，要追溯到33年前。卡卡蟬過別枝前大捷兼上榜首，確有賀佢喬遷嘅意境。
喬遷泛指祝賀人升遷或搬家，卡卡轉投皇家馬德里嘅話，人工加，而皇馬大搞，AC似乎想縮皮，此消彼長，如果佢由意大利搬去西班牙發展，總算係向上嘅社會流動。既然連施丹早幾日都爆料話卡卡會上「馬」，而AC個總理班主貝盧斯科尼又講咗句「冇咗卡卡，我哋仲有朗拿甸奴」畀晒提示，卡卡咁都唔走，真係「世紀假身」咯。禮拜三巴西迎戰巴拉圭場「兩巴」榜首大戰，話唔定卡卡到時已經係皇馬人囉。
巴西壓巴拉圭上榜首
講返前日場波，查實烏拉圭初段踢得唔算差，沿用一貫對巴西嘅殺傷戰術，即係硬朗攔截、畀波過唔畀人過，一度令森巴兵舉步維艱。不過巴西好快就適應，到11分鐘主隊因為門將韋亞拉送禮，唔知發咩神經判斷錯誤，接唔住丹尼爾明明無甚威脅嘅遠射。呢球波令「烏圭」洩氣，巴西之後由祖安頂入，加埋路爾斯法比安奴怒抽掛網，同埋卡卡射入由自己博到嘅12碼，湊成大捷。
一係唔贏，一贏就咁大鋪，難怪成場波戴住黃色鴨嘴帽嘅教練鄧加咁神氣，賽後星爺上身教人踢波：「波，並唔咁踢嘅！唔係靠起勢踢人同埋肉酸犯規就掂，踢波係講求射個波入網。」印象中，今屆南美洲區世盃外開打至今，巴西唔係俾阿根廷就係巴拉圭壓住，今次大勝夾啱巴拉圭爆大冷主場吞智利兩隻光蛋，家陣終於以得失球差力壓同樣13戰得24分嘅巴拉圭，升上積分榜首，鄧加飲得杯落。
