炒併購未到最後落實一刻，真係唔可以太老定。好似可口可樂併購滙源果汁（1886）一事，當時市場好有信心，但遭到否決後，滙源由10元樓上大插至3.88元先停得到，當初一心抱住事成而入貨的散戶當堂眼光光，所以跟消息炒股，無論係具有一定份量之股份，抑或係三四線股，一樣有可能中招。
不過話分兩頭，自從滙源在3月中勁跌之後，股價走勢開始回穩，近兩個多月已重拾升軌，踏入6月份，該股升勢更轉趨急勁，由5.33元抽升至上周五高位6.68元，回至6.32元收市。
市場有消息傳可口可樂死心不息要「翻兜」滙源，但並非重提全購，而係買入一定比例股份；另一版本係有幾家外國私募基金都對滙源有興趣，有意買入小量股份。
伺機買入短炒
此外，滙源亦公佈斥資3億元，在陝西投資果汁上游業務。有分析認為，滙源若上下游業務垂直整合，原料成本可望降低最多30%。利好消息頻傳，滙源估計未升完，伺機買入，短炒目標7.50元，以5.80元止蝕。
方星俠