香港人發揮人民力量，六四當晚逼爆維園，集會散場時，有位毋忘六四嘅有心人執到眼鏡一副，近排喺facebook呼籲物主認領。唔少網友讚呢位網友好心之餘，對究竟邊個跌眼鏡議論紛紛。
網民齊估邊個跌眼鏡
有網友估計，副眼鏡有可能係煲呔嘅，因為佢肯定俾集會人數嚇到成副眼鏡跌落地；有人就建議將副眼鏡還返畀話當年黑麻麻睇唔到天安門血腥鎮壓嘅「夜盲詹」，亦有人建議，副眼鏡不如送畀亂點人數錯得離譜嘅「特警成」。
其實仲有一個人選可以考慮，就係早排喺城市論壇上，發表學運變質謬論嘅呂智偉。當日論壇主持謝志峰發火反駁呂智偉嘅片段，至今喺YouTube已經有超過七萬人次點擊。八方噚日同謝志峰傾開，佢話六四晚咁多人參加集會，同曾蔭權、呂智偉嘅六四言論唔多唔少有關，破紀錄嘅集會人數反映咗香港發揮中國良心嘅角色。
謝志峰約呂智偉飲茶
謝志峰認為，大家觀點可以唔同，但引述資料必須正確，佢仲好大方咁假設呂智偉可能對歷史認知不足，上星期一約佢飲茶，諗住佢如果有乜唔清楚，大家可以交流吓。呂生初初都話OK，但到當日就臨時話想唞一唞先，仲話近期收到好多電話滋擾，因為有人將佢個電話放咗上網，呼籲網友「幫佢叫pizza」。
講到六四，謝志峰仍然義憤填膺，佢話當日學生反貪污，中國政府唔理，家貪污越嚟越嚴重，近日連深圳市長許宗衡都加入被雙規嘅行列。
講番尋找眼鏡物主嗰位網友，佢見到大家咁熱烈討論，噚晚忍唔住喺網上再回應，話其實佢唔係玩諷刺（雖然估唔到又真係有諷刺效果），佢真係執到副眼鏡，覺得有心嚟維園支持民主同平反六四嘅每一個人，都係兄弟姊妹炎黃子孫，唔想物主冇咗副眼鏡咁慘，所以當場拎住企喺度幾分鐘，怕副眼鏡被人踩爛，但係等極都唔見個物主返轉頭，所以先上facebook尋人。
既然呢位網友咁有心，八方都喺度幫佢呼籲吓，六四當晚唔見咗眼鏡就好聯絡呢位網友喇。
mailto:[email protected]