有啲知啲唔知啲嘅鬼佬，好鍾意攞我哋中文字大做文章。例如「危機」兩字，就成日俾一啲教管理學嘅人用嚟做教材，話中國人好有智慧咁睇到「有危就有機」。
今時今日，「危」就大把，咁「機」呢？原來都好多，不過睇吓你識唔識把握。上個禮拜，前GE行政總裁韋爾奇就喺一個論壇度成個「小志強」上身咁，大叫話進攻就係最好嘅防守，要把握金融海嘯去活埋競爭對手。
搶錢搶心搶人
點做呢？有三招：
第一，你間公司要盡量吸納現金，擸完就攬實。
第二，由最高話事人打落嘅管理層，一定要大幅提高溝通同透明度。家人心惶惶，你要令所有員工知你點諗，就算之前你已覺得溝通好好，都要加大10倍。
第三，公司有現金、上下溝通好之後，就係時候收購或者活埋對手。如果佢哋內部冇好似你咁做好溝通，一定人心惶惶。到時候搶佢哋嘅人、佢哋嘅研究員、sale屎……家就係活埋對手嘅時候嘞。
方法唔係冇，華華想知你做唔做到啫？