喺金融海嘯下，連慈善機構嘅捐款都少咁截，唔好話香港嘅公益金籌錢難，就連蓋茨盡獻身家、用佢同太太個名成立嘅比爾及梅琳達蓋茨基金會（BillandMelindaGatesFoundati）善款都少咗。據蓋茨基金會最新年報顯示，08年度個基金慈款少咗兩成，但都仲有2301億銀（港元．下同）。
自動捐款仍達811萬銀
2301億善款中，除咗蓋茨捐咗14.3億銀，仲包括佢老友畢菲特捐出嘅45萬股巴郡B股股票，價值140億銀。雖然舊年因為金融海嘯，唔少富豪身家縮水，但基金中都有唔少係自願性捐款，即係唔使基金出手就自動捐嚟嘅善款，有811萬銀，呢個睇怕都係因為蓋茨嘅魅力。
上年9月先由微軟過檔蓋茨基金做行政總裁嘅JeffRaikes，喺年報首份行政總裁報告度話，由商界轉做慈善之前都聽人講過，慈善事業係冇市場，雖然籌款唔易，但佢覺得同以前做微軟開發新產品好似──大家都係冇市場，要慢慢開發。咁即係籌款呢家嘢難唔到佢啦！
CEO：做慈善似開發軟 件
基金善款少咗，搞手蓋茨都出嚟交代吓，佢首次寫咗封AnnualLetter，提到當前經濟狀況同金融市場可謂史無前例……咁差，所以雖然希望兩年後當佢再執筆寫AnnualLetter時，金融海嘯已過，但就覺得海嘯嘅影響睇怕都會好深遠囉。
股神簽名靴賣兩萬一
蓋茨嘅基金善款縮水，其實以蓋茨個名，要揼人心口應該唔難，大可以搵佢老友股神畢菲特幫手。因為只要佢老人家喺屋企搵啲舊嘅衫褲鞋襪出嚟賣，原來都可以籌到一大筆錢。
打破蓋茨紀錄
據CNBC報道，畢菲特捐咗對有佢簽名嘅牛仔靴出嚟，喺美國內布拉斯加作慈善拍賣，賣咗2700蚊美金，即係2.1萬港銀。兩皮幾嘢買對靴究竟算唔算貴，真係見仁見智，但呢對靴就打破咗蓋茨創下嘅紀錄，據報道話，之前有蓋茨簽名嘅一對boots拍賣到2100蚊美金。你話蓋茨係咪應該搵畢老出手嘞！
今次拍賣所得善款，將會用於內布拉斯加大學醫學中心嘅Eppley癌症中心，同當地嘅衞生保健事務。
李華華
mailto:[email protected]