陸委會主委賴幸媛日前與訪台嘅林D9密會一小時，八方相信賴主委如果有睇當地電視新聞，對住呢部人肉錄音機時，早有心理準備。因為台灣中天新聞日前報道林D9訪台消息，索性以「"人肉錄音機"首位港官林瑞麟將訪台」為題，女主播介紹得仲好詳盡，「林瑞麟在香港很有名，他負責推動的是全民普選，但是他的表現，令香港民眾認為他只對北京言聽計從，因此諷刺他叫林公公，他還有一個綽號，叫人肉錄音機。」
配上熱播《瓜分》歌
中天新聞仲播埋早排香港熱播嘅《瓜分林瑞麟三十萬薪金》呢首歌出嚟，臨尾報道林D9被問到如何為台港關係取得突破時，再加句「林瑞麟再度發揮錄音機本色，說會按一貫原則進行。」有網友眼見林D9影衰香港，特別將呢段新聞片上載到YouTube，已經有2,000幾人睇過。
順帶一提，因為呢單新聞而衝出香港嘅《瓜分林瑞麟三十萬薪金》作者阿P，最近又同朋友整咗首新歌叫《上街的理由》，講7.1要站出來，歌詞依舊咁到肉，有興趣嘅讀者上網就搵到。