無綫因為《巾幗梟雄》柴九熱爆效應，今晚八點半食住上推出都係由李添勝監製嘅新劇《碧血鹽梟》，據知呢套劇本來只係用嚟賣埠，但食住個勢可以同香港觀眾見面。今次唔係講米，係講鹽，噚日劇中所有演員喺樂富中心宣傳，個個對套劇都有期望，不過就唔敢奢望會有《巾》劇咁強勁，連監製添哥都話：「收視好過《巾幗梟雄》係冇乜可能。」
學四奶奶咁勇
身為女主角嘅楊怡承認壓力好大，但係唔會灰心，佢亦控制唔到觀眾比較兩套劇，佢話：「一定有信心，我哋喺加拿大賣埠好好，兩套劇都係講必需品。我自己個角色就係由天真無知變成擔起頭家，同四奶奶相同嘅都係離唔開個勇字。」
男主角馬浚偉話家係抽起都係由佢做嘅《老友狗狗》，專登播《碧血鹽梟》，佢話：「我都好開心，兩套都係我做，你話唔係播我嘅劇就話唔開心。」馬仔就話自己冇壓力：「《巾》劇成功我都好開心，證明有實力嘅劇集會受觀眾歡迎，我自己都好鍾意黎耀祥同鄧萃雯，我相信好過《巾》劇都幾難，但係都會有期望，總之觀眾鍾意就得喇！」