久違了的張慧儀自6年前被過氣未婚夫、拉丁舞王霍紹裘打傷後，便傷心離開娛樂圈，轉戰內地從商，仍未結婚的她收養了患心臟病的5歲孤兒Hanson。張慧儀前日在港拍劇，談到養子時一臉滿足。
張慧儀兩年前在北京做義工時遇到孤兒Hanson，於是收養他，由於他患有嚴重先天性心臟病，慧儀計劃安排他做心臟手術。打扮樸素的張慧儀前日帶同Hanson到九龍灣拍攝港台單元劇《論盡一家人》外景。
「唔放心畀人湊」
已經轉型從商的張慧儀甚少在港露面，現在長居內地，專心打理健康食品生意及照顧養子。闊別螢幕多年的她笑容燦爛，略見心廣體胖，她笑說：「係呀，我肥咗！係咪同以前好唔同，你認唔認得我？今次返嚟香港兩至三日，幫港台拍個節目，順便帶個仔返嚟玩，我返嚟香港又唔放心留低佢畀人湊，咪帶埋佢嚟！」張慧儀一副慈母模樣，介紹養子給記者認識，不過Hanson很怕醜，她說：「佢以前好鍾意對住個鏡頭影相，我幫佢影好多，大大吓佢就唔想影！」
「心靈上好滿足」
張慧儀有子萬事足，一邊抱着兒子，一邊談及她的生活，她說：「我喺內地都要返工，請咗個人幫手湊仔，不過我份工好彈性，盡可能會自己一手一腳照顧個仔，老實講，自己湊體力上梗係辛苦，但係心靈上面真係好滿足，好開心。」今次張慧儀返港拍攝單元劇，會否令她戲癮大發？她說：「係咁啱港台搵我，家有自己生意，都唔會經常拍。」
攝影、採訪：楊潔雯
