近期大行飢不擇食現象出現次數越來越頻密，其目的無非係為盡快籌旗還畀佢哋政府，進而舒舒服服分花紅話之你，出年再無以為繼都未必關自己事，近期大家可有發現，以往只會有中小型企業融資才會介入的二三四五線上市公司，亦始料不及地獲得大大間美資行青睞，家班大行唔知係人窮志短抑或老細畀壓力，連中小型上市公司都唔放過。
CB換股價變目標價
記得97年紅籌狂潮令許多券商唔係飢不擇食，而係搵得多就想搵更多，當年有一家本地中資大型券商就差點因為替一隻炒股進行配股而出事。美資大行沒有中資阿爺嘅遙控包袱，奉行捉到老鼠就係好貓策略，連出報告都不再求人，最主要係信唔過Counterparty。
以往A大行見完甲上市公司，覺得唔買就笨，權宜之計係由另一家大行出報告，自己坐盤交易就密密掃貨，同埋吹雞叫齊班客戶一齊上車，起碼外人睇上去無咁核突。
可惜唔知係唔係壓力大，家好多報告上個禮拜仲話個市升過龍，呢個星期就話個市仲有得去，加埋啲模稜兩可、未來幾十日有幾多成機會升或跌嘅報告，跟住就手口並用，自彈自唱兼邊走邊唱更已屢見不鮮，真係神又係佢鬼又係佢。仲有以往好大個鼻嘅分析員家連同板塊中嘅落後三四線都肯睇埋出報告，之不過唔夠一個星期就幫人一條龍服務配埋股。
幫忙進行融資，包括債務融資和股本融資兩方面，一個是透過發行可換股債券變相貸款予上市公司，問題核心並非最終換股與否，而是只要換股價高於現價，就會成功引導市場對股價有個目標。
雖然問大行借總好過問大耳窿，然而對於一些唔長進不務正業得個殼嘅上市公司，點樣借法同揀緊邊條路無咩分別，難得市場總有唔少股壇敢死隊自動請纓，自作聰明以換股價作為股價上升空間定目標價。
殼股搞邊瓣都未決定
有分析員甚至話睇完都唔知間公司搞邊科，總之個市一日仲有錢有人仲身痕就要把握機會；有股價已經炒到飛沙走石嘅上市殼之管理層，甚至連自己間「嘢」將來想做邊瓣都未決定，總之潮流興搞邊科就做邊科，佢講你就聽住先，未必要信嘅，炒兩炒唔好做人世就得啦！
胡孟青