灣仔區議會補選，民建聯派出鍾嘉敏對撼社民連嘅地鐵救火英雄季詩傑，噚日民記喺鵝頸橋底打小人，幫佢造勢拉票，仲搵嚟三個義工扮小人，俾額頭粒癦好似家燕姐嘅鍾嘉敏用大拖鞋打，寓意解決區內污糟後巷等問題喎。
鍾小姐自稱喺區內服務12年，但點解呢啲問題咁耐都未搞掂呢，佢就冇解釋到。今次補選本月21日投票，喺正六四同7.1之間，負責為鍾嘉敏策劃選舉工程嘅民記成員孫啟昌話，早排喺灣仔見到唔少人上街爭取平反六四，但呢樣嘢「同區選無關」，又學煲呔咁扮代表，話選區內街坊「唔太關注呢啲嘢」，加埋該區投票率一向極低，民建聯有信心攞到1,300票，好有信心贏出。