二次大戰結束，有人用成副身家換一包米，亦有人晚晚穿金戴銀，揸住架靚車四圍媾女！如此富貴，講緊嘅就係《浮生路》劇情。五十年代，戲內一對小夫妻為追求人生目標，甘願辭工兼落仔；要感受吓戰後班美國佬點解咁富貴，買隻DVD，睇埋30分鐘Bonus自有分曉！
記者：陳國輝
埋怨的夢想路
故事以大戰後五十年代嘅美國為背景，一對年輕夫婦法蘭（里安納度狄卡比奧飾）與愛普（琦溫斯莉飾）自視與眾不同，只希望去到夢想之都巴黎追求理想，擺脫刻板嘅生活，但現實衝擊往往無法令計劃如願，因此雙方開始變得互相懷疑、埋怨，喺追夢道路上，還發現大家從沒有並肩而行，夢想與現實嘅取捨，令兩人感情越來越淡……
巢皮肥溫好戲
唔講劇情，齋睇牌面已經夠照！男女主角分別係12年前熱爆全球嘅《鐵達尼號》金童玉女，仲記得女主角曾被傳媒改名叫「肥溫」，當年肥肥白白一名「肉」女，今日卻變成三十出頭仲嫁埋人嘅小女人；塊面瘦咗、臉皮巢咗都唔緊要，感情戲越演越老練，堅強、感性、鹵莽通通比12年前發揮得更淋漓盡致，只怪里奧仔一直未成熟過，性格老是嬉皮笑臉，愛到處媾女嘅死臭飛，也難怪當Bonus內提到導演選角，一睇劇本就揀定里奧仔啦！
騎呢配角解悶
睇唔慣文戲，呢120分鐘好可能好難捱過；《浮生路》係一套小品式文藝愛情片，劇情節奏緩慢不突只，更妄想有王家衞嗰隻華麗而古典嘅風格，但感覺只係好實在嘅五十年代美國生活；或者導演都驚觀眾會悶到瞓，所以戲內特別加插幾名騎呢鄰居，例如一位對琦溫日久生情嘅已婚漢，另一位係麻煩包租婆，至於最爆呢位，係一名神經質數學天才，佢每次去里奧仔屋企踩場，總喜歡篤爆人哋家庭醜事，專搞惡作劇；好彩有呢位仁兄，否則小記真係會瞓着。
重溫戰後生活
想睇Blu-ray高清版，就要等多個禮拜；但如果你真係咁心急，不妨先買隻DVD頂住。老實講，文藝愛情片都唔興玩豪華大包裝，《浮生路》都一樣，簡簡單單，Bonus內容只有「導演及編劇講評」、「電影製作特輯」以及「刪剪片段」，係咪好悶就要大家睇過先知；但值得一讚係，長達30分鐘嘅製作特輯內，大量篇幅描述五十年代嘅美國生活係點，例如有當年夜夜笙哥嘅舞廳、Sales辦公室、慣常家居擺設，甚至文員所穿着嘅西裝款式，無論有冇興趣知都好，只可以講句勁詳盡。
Profile
片名：《浮生路》
種類：愛情片
音效︰杜比數碼5.1環迴音效
字幕︰中、英文
特別收錄︰導演及編劇講評、製作特輯、刪剪片段
