公務員事務局日前公佈升官榜，煲呔愛將Cathy朱曼鈴係唯一一個唔使署任，官階就由D3直升D4嘅官員，有人指如此「拔尖」同常規唔同，政務官圈子近日好多人講起呢單嘢都好火，大家唔係針對人，只係以事論事，質疑升遷制度是否變質，覺得家好似只要係煲呔愛將，話咁快就有得升。
一年前升完又再升
Cathy現任西九文化區辦公室主管，呢個位本來只屬D3級，但隨住Cathy升職，亦相應提升級數，八方不評論是否度身訂做，事關呢啲事永遠口同鼻拗，官場人士亦話毋須深究，因為公道自在人心。Cathy升職好多人戥佢高興，而且D3直升D4亦非冇先例，有人指何宣威同葉文輝當年都係咁快上位，前者苦候多年先升到D8，後者一直原地踏步，所以近年已罕見「拔尖」。
有人則話佩服Cathy伯樂嘅慧眼，因為Cathy升D3僅一年就再升D4，喺西九辦公室工作不足一年，就睇得出佢喺呢個崗位表現出色，若非有過人眼光，精於發掘千里馬，又如何評審佢嘅表現呢？