香港人去台灣幾乎玩到厭，士林、誠品唔使預我，台中住民宿、踩單車遊花蓮就有啲興趣，不過香港有個高官，幾十歲人先第一次去台灣，就係政制及內地事務局局長林瑞麟，係回歸後官式訪台第一人。佢噚日早上同陸委會主委賴幸媛見面，對於呢個歷史性會面，陸委會不證實也不評論有冇見過林D9，搞到十分神秘。
台傳媒冇重點報道
港府事前冇透露林D9會見賴幸媛，據稱噚日林D9抵達陸委會所在大樓時，並冇在大門落車，直駛入停車場，所以雖然佢係歷來進入台灣政府機構拜會嘅香港及大陸最高級官員，都冇留下歷史一刻相片，港府新聞處則喺噚日下午發出兩張林、賴會面相片。
會面一小時後，林D9離開陸委會才同記者講述會面內容，首先證實見過賴幸媛，並引述對方稱歡迎台、港合作有新發展，兩地同意新設「台港經濟文化合作策進會」，下設「經濟合作委員會」，同香港貿易發展局「香港台灣商貿合作委員會」為對口，林D9話會盡快敲定成員，日後亦會繼續安排高層互訪，今次冇特別提出特首煲呔訪台問題。
陸委會冷處理林D9到訪，有人講笑指可能係因為陸委會真係唔覺得同一個官員會面，因為林D9係官場聞名人肉錄音機，去到台灣本質都不會改變，陸委會官員面對一部錄音機，無奈心情可以想像。身為錄音機有錄音機嘅功能，台灣傳媒報道，林D9赴台前獲國台辦主任王毅、海協會會長陳雲林「面授機宜」，指示佢去到台灣切勿行差踏錯，雖然佢否認獲京官指點，不過此行有冇傳遞口信，仍然令人充滿想像空間。
由於歷史問題，台、港關係一直可有可無，一般人亦不太在意兩地政府有冇官方接觸，當地傳媒呢幾日冇特別重點報道林D9訪台消息，台灣行家指大陸官員都已登台多時，香港官員到訪重要性相對次要，加上大陸高官到台灣，通常會有大批商界代表隨行，分分鐘喺台灣落實大買賣，新聞性較高，反觀港官訪問只係純粹官式商談，同大陸官員到台，不可相提並論。
mailto:[email protected]