筆者在金融海嘯前一直以淡友自居，至5月初時，士佳指出大市有機會由熊轉牛，於是放下淡倉，全力做好，當時轉身唔算早，並在友報寫下亡羊補牢一文，現在看來都唔算遲，皆因如果繼續看淡，肯定被挾個稀巴爛。
筆者相信，若非股指巨無霸中移動（0941）受累中央政策傾斜，表現乏善可陳，大市升勢將會更勁，可喜的是升市期間個股卻百花齊放，以「瘋狂」來形容亦絕不為過，各板塊輪流炒，筆者亦跟住輪流炒，就算大市近日破頂乏力，仍有不少細股大升，例如上周五期指只算反覆上落，個別細股如中能控股（228）及中亞能源（850）卻升到飛起，筆者早兩日運用技術分析軟件及時篩選，剛好享受到升幅。
大市升到19000，看好者認為資金泛濫，大市仲有得升，看淡者覺得經濟未恢復，升幅只係建於浮沙之上，依然是牛熊莫辨，而筆者運用自己系統定義，已肯定進入牛市，讀者肯定問:「經濟咁差，點會有牛市?」其實牛市只是大市不會再穿底，唔代表會即時飛升，就像82-83年市況一樣。另一方面，就算大市進入牛市，通常附送震倉，就似當日筆者系統確認熊市，士佳反而是入貨炒熊市反彈一樣。再者，大市由11325升至18900水平，足足升了超過7000點，有震倉亦不足為奇，所以筆者近兩天已有所收斂，出貨比入貨多，當然，後市有可能先衝上20000，甚至21000，但筆者相信，震倉一跌依然難免，所以寧願蝕底些，唔賺到盡，先趁高套利，保持兩三成股票好倉，然後吼低再買。
跌市便知龍與鳳
現在趁調整未出現，讀者應該想想自己的ShoppingList，筆者估計今次牛市與2000年科網泡沫相似，以泡沫概念主導，縱觀環球市場，有兩個泡沫正炒得熱烘烘，第一個是通脹，市場憂慮美元弱勢及資金氾濫會引發通脹，是否真有其事，筆者覺得現時難下定論，但通脹股如內房股已經受惠，表現十分出眾，回調再上，相信仍有得炒，到時就可以考慮。
第二個 是新能源概念，市場上的個股中，有些是新能源，亦有些「假」能源，要長線持有，當然要揀真正優質股，所以更要借震倉幫手，因為跌市係照妖鏡，能試出個股體質，真真假假，市場力量自然會告之，讀者不妨找出新能源相關股，如興業太陽能（750），陽光能源（757），比亞迪股份（1211），中國風電（182）及保利協鑫（3800）等等，到回調到咁上下，互相比對，就知道上述個股龍與鳳。
張士佳