父親節將至，相信唔少孝順仔女都已預備好同爸爸慶祝。工作一向非常忙碌兼節目多多嘅立法會議員，父親節當日反而冇人約。噚日李華明、方剛同劉健儀等人出席齊抗金融海嘯大聯盟活動，派發以父親節為主題嘅消費券，幾個人都異口同聲話仔女都唔喺香港，所以要孤獨過節。
李華明話女兒留學澳洲，平日只以電話、電腦聯絡，所以父親節當日會同街坊去一天遊慶祝，夜晚先同愛妻食飯。方剛就大想頭啲，因為個仔身在上海工作，希望佢識做，會飛返香港同佢食餐飯。劉健儀仲犀利，佢自言逾30幾年冇同父母慶祝父親節、母親節，不過每年都會寄張心意卡同鮮花畀兩個老人家，錢就當然唔少得啦！