如果下次有人話你身形似西瓜，唔好嬲住，佢唔一定係笑你肥到圓咕碌，可能係讚你夠惹火。事關噚日我喺九龍城見到一個葫蘆形西瓜（圖），好鬼搞笑，明明係西瓜，走去扮葫蘆，但一見個價錢，嚇咗一跳，嘩，$8,800㗎！
近期水蜜桃枇杷果當造
九龍城永富老闆陳生話，呢個葫蘆西瓜嚟自日本香川嘅農場，呢度就係當年首創四方形西瓜嘅地方，葫蘆西瓜種植嘅原理同之前大致相同，就係畀個西瓜喺一個葫蘆形膠模裏面成長，等佢成熟變大嘅時候變成葫蘆形，但大部份都會失敗，變唔到葫蘆形，或者逼爆咗個膠模等，所以成功嘅真係萬中無一，「所以要賣成幾千蚊囉」。佢話變形西瓜吸收更多養份，所以種喺旁邊嘅幾十個西瓜都會特別瘦。
佢話呢類三角形、心形嘅古怪西瓜，每個賣幾千蚊，但幾乎每次喺日本運嚟兩三個都會賣晒，買嘅都多數係證券行等，用嚟送畀大客，雖然有金融海嘯，但呢幾日股市有熱錢流入，所以已經有幾個客嚟睇過呢個葫蘆西瓜。
我就冇熱錢流入，都係買番啲普通日本生果算，老闆話呢排當造嘅係水蜜桃、枇杷果，百幾蚊至幾百蚊一盒，一盒五至六個，雖然係貴啲，但日本水果嘅香甜度又真係幾吸引嘅。
電郵：mailto:[email protected]