富豪（078）半年嚟好似點咗穴咁，冇點郁過，大落後於同系及近磅股，可博富豪翻半番。過去半年，富豪系內百利保（617），已經翻咗一個番，控股公司世城（355）亦唔弱，同期升咗84%。而同樣主打本港酒店業嘅遠展（035）及泛店（292），分別都翻咗一番及半番。富豪又點，同期升幅得15%，落後到爆。
富豪去年底連酒店資產重秤後嘅NAV達10蚊，現價2.05元折讓接近80%。集團同期揸住淨現金12億銀，相當於每股1.18元，係股價嘅50%。呢期股仔炒到㷫烚烚，但有質素嘅買少見少，富豪既係現金牛，NAV折讓又咁吸引，買富豪，相對安心。
好簡單計條數，富豪追番同系及近磅股升幅，翻一番到4蚊，NAV折讓仲講緊有60%，呢轉係咁易博翻半番到3.07元，折讓仲係挨近70%，set呢個目標價，其實好保守。
華藝博有資金埋位
華藝礦業（559）03年沙士低位3.86元，現價0.64元，比沙士價仲要再跌多83%，相對07年高位9蚊，跌剩唔夠10%，殘到痹。又集團連埋最近兩次配股集資攤薄效應計，最新NAV有1.39元，現價0.64元折讓近54%，有唔錯嘅NAV墊底。
上周五所見，森源鈦（353）單日升咗26%，中亞能源（850）升36%，資金蜂擁細價資源及能源股，博華藝有資金埋位，短打一轉，博升20%到0.77元，仲未有耐到NAV。
錢雋