小藍一向支持正版，上次踢爆內地啲blu-ray老翻價錢又貴又唔掂。但唔講唔知，原來就算係同一齣電影嘅正版blu-ray影碟，唔同地區嘅版本，質素都有高低分野。照計家呢個數碼年代，又唔係模擬制式，啲blu-ray影碟都係用同一個母碟製作，數碼訊號應該唔會有損失，咁點解唔同版本，啲影碟質素會有分別？
美版質素最平均
亞洲高清協會會長Alan話，理論上質素應該唔會有分別，但實際上唔同地方製作嘅版本，質素又真係有唔同。原則上美版blu-ray影碟嘅質素最平均，比起亞洲地區又真係靚啲。
Alan解釋，家巿場嘅電影大部份係美國片，故當地blu-ray影碟嘅製作水準好高，「美版特色係電影菲林味道好強，顏色豐富，變化多端，同埋好有層次感，部份碟仲做埋中文字幕㖭。」Alan話，因為按唔同國家地區需要，會將套片嘅母帶拎去其他地區做encoding（編碼程序），加入字幕同花絮。
Alan話，套片再encoding會涉及人為問題，製作人員會有個人風格，鍾意調校吓畫面嘅光暗咁，最重要係亞洲地區會追求將畫面有咁sharp做到咁sharp，咁樣少咗啲電影味道。」講起日本，Alan話製作喺亞洲區都唔差，偶然間有啲日版碟會做得靚過美版，但唔係咁多。