早前被內地殺手計劃暗殺嘅李柱銘，前晚為平反六四無畏無懼，繼續單拖到維園，同市民一齊高舉六四燭光，點知六四燭光集會完咗後，佢即刻被人圍住，仲要搞到走極都走唔甩。
因為唔少市民睇見喺立會退落嚟嘅馬丁，都即時捉住佢唔放，又要簽名，又捉佢合照，結果搞到馬丁喺晚會結束後大半個鐘頭都未走得甩。唔少馬丁Fans都係年輕人，無論貼面影相，定擺六四手勢，馬丁都樂意奉陪。
馬丁講起前晚港人創下歷史紀錄，就話香港人經常都會畀佢驚喜，話之前諗過六四燭光人數會多過之前幾年，但冇諗過多得咁緊要，最令佢感動係89年出世嘅後生仔都堅持平反六四。