六四燭光集會主菜係萬千燭光，今年集會多咗碟配菜。TVB記者方東昇喺維園做直播時，背後有人突然高舉「無綫新聞 事事旦旦」紙牌，明寸TVB畫面直播出街，全港觀眾一齊直擊呢幕經典場面，TVB內部消息稱，新聞部話事人目睹呢個鏡頭，即時怒不可遏拍枱，被人踩場明剃眼眉，唔㷫就假。
疑似被裁員工回敬禮
呢單令TVB到爆突發事故，八方聽聞暫未有人要問責，不過網上版已遭「竄改」歷史，cut咗尷尬一幕。TVB內部則議論紛紛紙牌人是誰；有人估計係愛之深、責之切嘅忠實電視迷，不過更多人認為可能係早前被裁員工，由於不滿硬食TVB豉椒炒魷，無啖好食，豉油煎蛋又一餐，所以憤而在鏡頭前回敬一碟「事事旦旦」畀志雲飯局。
無綫中人有此推測，係因為紙牌人似乎好熟悉鏡頭擺位，全程左右移動跟住鏡頭博上鏡，一般市民應該冇咁識走位。八方前晚身在維園，目睹紙牌人舉動都十分驚奇，事後同佢吹水，原來佢係八方同宗，自稱從事製造業，連續七年參加燭光集會，因為不滿無綫新聞自我審查很少報道六四20周年新聞，所以自備紙牌趁機「突襲」向TVB抗議。
香港人十分擔心河蟹入侵本地傳媒，金睛火眼實各大電視台如何報道悼念六四新聞，住喺上水嘅葉先生話，前晚無暇到維園，惟有留在家睇電視，點知亞視同無綫新聞都蜻蜓點水，轉台睇有線，到咗9點10分集會進入高潮時，畫面卻突然定格兼失聲。葉生後生時在內地見識過中共控制言論嘅手段，有線喺敏感時刻故障，佢認為必有內情。
屯門伍先生亦有同樣問題，六四晚有線電視訊號由9點鐘左右故障，直至11點幾燭光集會結束才恢復正常，佢好擔心香港連新聞自由都冇埋。有線發言人稱，六四晚上網絡冇故障，可能係個別用戶解碼器有問題。影視處同電訊管理局冇收過有關投訴。
其實近日唔少人聽收音機同睇電視都覺得有古怪，每當節目提及六四事件，訊號就無故接收不良，資訊封鎖陰霾擴散到香港，諗吓都心寒。
mailto:[email protected]