雷曼小組噚日開會唔夠幾分鐘，小組主席何鍾泰就話要休會，原因係唔夠法定人數，好在有議員匆匆趕入議事廳，聆訊先可以繼續。
雖然有流會危機，但一班保皇派議員開會期間仍不時走出走入，鼠王芬同民建聯陳鑑林離開會議廳時更即時斷正，被何鍾泰指示佢哋唔好離座，否則會議唔夠人數就流會開唔成。
除咗有人坐唔定，當初踢走甘威爭做小組副主席嘅「中指黃」黃宜弘，噚日更缺席會議，反而甘威就場場現身。何鍾泰會後話上星期已去信各議員，重申出席率同守時好重要，希望大家勤力啲，否則浪費時間影響聆訊進度，不過佢話唔會披露各人出席率，「大家都睇到邊個勤力，邊個唔勤力。」